Willem Vermandere: Litanie

't is t'hopen dat 'k vannacht goe kan slapen
't is t'hopen dat 't morgen goe were go maken
't is t'hopen wat zunne en nie te veel regen
't is t'hopen ook niet t'heet want daor kan ik nie tegen

't is t'hopen dat we morgen genoeg hebben om t'eten
't is t'hopen dat we de schooier nie moeten vergeten
't is t'hopen een groot vers rond bruin brood
't is t'hopen in mijn huis geen ziekte of geen dood

't is t'hopen dat we morgen wat leute gaan maken
't is t'hopen dat d'hesp en 't bier goe gaan smaken
't is t'hopen dat er morgen ne keer wat gebeurt
't is t'hopen dat 't wat is dat niet dagelijks gebeurt

't is t'hopen de beek aan mijn deure vol vis
't is t'hopen ook wat paling en de boorden vol lis
't is t'hopen dat er niemand geen zeer meer moet hebben
't is t'hopen dat we stoppen van altijd meer te moeten hebben

't is t'hopen dat de meisjes gaan dansen op strate
't is t'hopen met muziek tot 's avonds late
't is t'hopen dan slapen heel ongestoord
't is t'hopen geen lawaai dat de stilte vermoordt

't is t'hopen mijn vader en mijn moeder gezond
't is t'hopen ook mijn kinders, mijn kat en mijn hond
't is t'hopen mijn liefste vrouw an mijn zij
't is t'hopen voor altijd dichte bij mij

't is t'hopen, 't is t'hopen altijd maar voort
't is t'hopen, 't is t'hopen 't is al dat j'hoort
't is t'hopen, 't is t'hopen 't is de wereld zijne gang
't is t'hopen dat we blijven hopen ons leven long.